Gintasan

So kasasarig ko Allah na phakada ko balamban o mga awida akal na khilaod so kamboko ko da a diden pimbarang. Na khada so karibabeng ago so kapaka rimeng, na khisambi so kalangas a kapipiya ginawa. So langowan o galebek a mga pipiya na aya bo a tharimaan non o Allah na sabo sa kapeniniatan non sa mapiya.

Na saden sa pephaka batiya sangkai na peniniati niyan sa mapiya ka embalasan non o Allah ka kadadaleman sa ongangen a obaden makaibarat ko pamomolan a makatho ko puso o pizakatawan; na sobo so bekao niyan na khasanaan a bolong ko mga awida akal, na so kayo niyan na khaapasan, na so sapakian na khalindongan, na so raon niyan na khasirongan, na so onga niyan na kharebasan sa mapiya a kapenggonaan niyan sa donya na sii pen sa kitalingoma o dalem mo isa a alongan.

PANANADEM

So pananadem na simba ka ped ko paratiyaya ko kadenan a phapaar a pepha ngangaronganan, ka so daa tademian na mawatan ko mapiya ka daa pethademan non o Allah. Na inaden niyan so mga manosia na phinasion niyan siran, nago phikaong-kaom siran, nago pithikalokes siran kaan siran dii makakhikilalai. Na oman ni isa ka kaom na so basa iran na aya iran dii mizisinabota ko kamamanosia-i kiran na isaon ka kaom so mga Meranao, na so basa Meranao i-dii mishisinabota o mga tao sa inged da ranao.

Giangkai a mini sorat a mga kakampet a basa Meranao na pananadem mai ko basa o mga lokes tano ka oba mada na antap ko mga moriatao tano ka siran ni lamba a panginam tano ko akiran no masa ka siran ni phakasambi a dii mamagodasa ko kapiya o dii kapagingedi sa inged da ranao. Na so basa iran a basa Meranao na aniran aya dii mizisinabota ko ikapiya iran.

MOSAWIR KO KAPAKA SOWA

1. Da a lalao o piaganad odi mipangedao
2. Da a lalao o miya ilay amay ka di sowaan
3. Da a lalao o mianeg amay ka dinggalebeken
4. Daa lalao o kasangkapan odi miphapandayan
5. Daa lalao o kapasang o dinggolalanen
6. Da a lalao o ilmo odi kanggonai
7. Da a lalao o sogoan amay ko di mitoman
   

BALAMBAN O KAPAGANAD

1. Mawatan ko mapiya so tao a bobokolen
2. Mawatan ko mapiya so tao a di makaroroyoden
3. Mawatan ko mapiya so tao a di thotomangked
4. Mawatan ko mapiya so tao a marangit
5. Mawatan ko mapiya so tao a matakaboren
6. Mawatan ko mapiya so tao a mangingimporoan
7. Mawatan ko mapiya so tao a di thoman sa pasad
   

KAPAKA SELANG SA MALIWANAG

1. So agama niyan na di phakasondong
2. So ginawa niyan na di pekhadapanas
3. So moriatao niyan na di phakarondan
4. So tangan niyan na di khadadas
5. So katao niyan na di phakakhap
6. So bangsa niyan na di khibaba
7. So kaya iyan na di khada

MADADALEM A ONGANGEN KO KAPAMELALAG

So lalag na pasodan nago onayan o mga ola-ola a mathotomadeng o mga paparangayan a manggogolawasan o mga sowa-sowai a aya dii kaphasodan o dii kapangnala ko mga andaowan o agama Islam

Source: Paninggalan sa Ranao